ÇINAYRÊ CHP DE BİUNE NAMZETÊ MEBUSİYE?
Qomê mao delali, Dêsımızê qedırgırani,
Ez wazen ke, meremê zerê xo eve zonê moa xo, sıma rê arezekerine.
Pilu vato ke, her vas kokê xo sero roêno, her teyr eve zonê xo waneno.
Ma ki isonime, bınê osmêne khewi de serê hardê Dewreşi de zu rengime zu vengime.
Hardê dewreşi sero, reng u vengê bini çığaşi ke wayirê heqe u asaletiyê, honde heqa ma ki esta.
Gere ke na heqe ra kes morım mevino na heqe ma rê jede mevino. O waxt ma gere na pers xora perskeme.
Heqe u esaletê xo, kamiya xo koti kamıji meqam de biamera zon ke, alem vengê ma bıhesno. Helvet ke, ison heme ca heqa xo mudefa kerdene sero gureyêno. Hama caê esto ke, temsilkarê isoni ke uza bi, eke eve vengo de areze u heqaniyet heqa qomê xuyê mazlumi ardera zon, dina o veng ra bena xeverdare.
O meqam Parlamentowo. Parlamentoyê Turkiya de hata ve nıka vengê ma Dêsımızu eve kamiya Dêsımi coru areze temsil nêbiyo. Qetlê Dêsımi, surgınê Dêsımi, talan terisê Dêsımi eve fıkrê na waxt isoniye era zon nêamo.
Çıxaş ke gegane qalê Dêsımi biyo uza çarno tayê mesulunê binu ra, hen qeseykerdo. Çetıniya Dêsımi, tenga Dêsımi eke eve xoseriya Dêsımi era zon nêarde kes gosnêdano.
Dêsımıji xêle waxto mesela Dêsımi sero gureyênê. Ez ki eve kamiya vervekiye ra xêyle serio Dewa Dêsımi rê xızmete ken. Mekemunê Turkiya de, Mekemê Awrupa de Verfekê Dêsımi u vengê Dêsımiune. Mı ke dewa Seyd Rızay u alvozunê ey Seyidunê Dêsımi kerde ra, zofe tenu mı ra vake ke, “caverde cıra duri vınde”. Nıka dewa Dêsımi xêyle avê ama, dina de xêyle cau de dewa Dêsımi endi nasbena. Ma ke na dewa sero nêguriyêne, nêqefeliyêne, Servezirê Tırkiya Erdoğani qale “Tertelê Dêsımi” nêkerdêne.
Dewa Desim Kılite Demokrasiye Anadolia
Kılıtê Demokrasiyê Anadoliye, eve haştiye u eve zerepakiye dewa Dêsımi qewulkerdene u dırvetê Dêsımi weskerdene dero. Dewa Dêsımi teyna dewa Mamekiye (Tunceli) niya. Qoçgıriye, Çorum, Meras, Meladiya u qırrkerdena qomê mayê Anadoliye pêro dewa Desımia. Dewlete ke na tertele, surgın u qırrkerdene sero qeseykerdene qewul kerde, dırveti piştene sero guriye, tenga Mıletê Kurdi dahil her meselu u tengiye sero qeseykena. O waxt tenganiya welati sero çare saêkerdena teyna bena rete.
Tenganiya Kurdu dahil her çetıniya welati halkerdene de, gere ke her kes tenê xo bıvurno.
Eve kılmekiye Partiyê Kurdu, Partiyê Tırku, Partiyê Sosyal demokrat u Çhepçiu hata ve MHP bile gereke xo bıvurnê.
Sa Kemal Kılıçdaroğlu ke amo umumi serveriya CHP, aê de vurnayêne biyo ra. Na vurnayêne hetê Demokrasi ser asena, programê weçintena 2011 Hazirane ke ilanet kerd daha areze asa ke, CHP meyilê vurnayêne dera. Mavênê namzetunê Mebusiye tayin kerdene de
Sa Kılıçdaroğlu ra mı rê sılayiye amê. Na mordemê maê cısne rezi mıra vake ke “Uşê laaqê Anadoliye ra xızmeta Demokrasi de wazen ke, tı ki wertê mebusunê CHP de Welati rê xızmete bıkerê.”
Waxtê mıno derg eke bıbiyêne, ez amêne Mamekiye, mı honde ke besekerd qomê ma kerdêne top, cıra pers kerdêne hen qerar dêne. Tek zu sewe waxtê mı bi. A sewe honde ke mı besekerd nas u dostu ra pers kerd. Pêroine mı ra vake ke, “Tı gere vengê ma Meclisê Tırkiya de berz kerê. Vurnayêna CHP de qewete Kemal Kılıçdaroğlu dê.”
1. Sa Kılıçdaroğlu mordemo de rezo, ez yinam ken ke, Tırkiya de phoştdariye ke cıdiyo podarê verê Demokrasi de darinê we. Qız bınde na podaru wedardenerê rayê bena ra, Qanunnama esasiye (Anayasa) newede vırajina.
2. Zulmê Osmanlı ra gore qomê ma dayma Cumuriyeti rê biyo phoştdar, Osmanlı ra dıme Cumuriyati coru qomê made eve ri wayişiye nianêdo. Waxtê Cumuriyeti de 88 serrio ke, sıfte zu mordemê ma amo serveriya CHP u biyo namzetê Serveziriya Tırkiya.
3. Oncia eve vatena nas u dostunê ma, heme het ra no fırsato de rındo, eve laağiya qomê maê qedırgıranê mazlumi, Dêsım Meclisê Tırkia de temsil ken. Mesuliyet u xızmete ra vozdayêne, mordemo jê Kılıçdaroğlu bê phoşti verdayêna era ma nêşikina.
Na ruval ra mı sılayiya Kılıçdaroğlu qewul kerde. İsala na rayêde Dêsım karli vejino, emegdar u mazlumê Tırkiya karli vejinê, Demokrasirê xızmeta de rınde keme.
Eve esq u niaz !
Namzetê Mebusê Dêsımi
Avukat Hüseyin Aygün.
|
DErsim kirmanc 2011-06-14
bira tore bimbarekbo ama ne bizoneme ke chp Dersimde aze ma niwerda u ruallra iso zutir rey dano chp 
